“Aik ghar. Aik chatt. Aik kamra. Wohi kamra jo main apne haathoon se sajaon gi. Tumhari kitabain. Mera makeup aur perfumes. Tumhare side table pe mere jhumke. Bistar ki chadar main woh chand silwatain. Kone main aik almaari jis main meri cheezain hamaisha tumhari cheezoon se ziyada hoon gi. Tum mujh se laro ge k main har cheez ki jagah badal dayti hoon. Main tangg aa kar yaad dilwaon gi k har cheez agar apni makhsoos jagah par wapis rakh di jaye tou yeh shikayat hi na ho. Subha subha tumhe saamne pari socks nazar nahi ayain ge. Tum awaazain de de kar poora ghar sar pe utha lo ge. Kitchen se dhorti huwi phir bhi main he aaon gi aur socks pakrate huwe kahoon gi, “Aaj shayad phir bread jal jaye. Tumhe jala hua naashta itna pasand hai?” Tum muskuro ge, thora itrao ge, aur kaho ge, “Mujhe acha lagta hai jab tum mere kaam karti ho. Rooz tum he tayyaar kiya karo.” Yeh sun kar main phir pighal jaon gi. Aur uss waqt kamre ki bigri huwi halat bhi mujhe paraishaan nahi karay gi. Tumhare janay k baad main aik aik cheez saaf karoon gi. Tumhare kapre wapis unki jagah pe rakhoon gi. Bistar theekh karoon gi. Shayad tumhara favourite gaana gungunaon gi. Tumhare takiye se urti khushboo mujhe tumhari yaad dilaye gi aur main khudh se aitraaf karoon gi: mujhe phir tum se pyaar ho gaya hai. Har lamha, har pal, kabhi na kam hone wali iss shiddat ka naam: main, tum, aur hamari mohabbat. Aurat pyaar main kamzoor nahi hoti. Mard ko hamaisha uski ziyada zaroorat rehti hai. Woh uska har chota bara kaam iss liye apne sar layti hai kyun k usse maloom hota hai… poori duniya ghoom kar bhi uski mohabbat uske shohar ko ghar kheench laye gi. Aur main ussi din ka intezaar kar rahi hoon jab tum ghar aao ge. Mere pass.”

hijab and ﺭﻣﺰﻳﺎﺕ image Image by نورا